(ก) คนฺโธ คนฺธธาตูติ?

สีลคนฺโธ สมาธิคนฺโธ ปญฺญาคนฺโธ คนฺโธ, น คนฺธธาตุฯ คนฺธธาตุ คนฺโธ เจว คนฺธธาตุ จฯ

(ข) คนฺธธาตุ คนฺโธติ? อามนฺตาฯ

(ก) รโส รสธาตูติ?

อตฺถรโส ธมฺมรโส วิมุตฺติรโส รโส, น รสธาตุฯ รสธาตุ รโส เจว รสธาตุ จฯ

(ข) รสธาตุ รโสติ? อามนฺตาฯ (โผฏฺฐพฺโพ ฆานสทิโส)ฯ

(ก) จกฺขุวิญฺญาณํ จกฺขุวิญฺญาณธาตูติ? อามนฺตาฯ

(ข) จกฺขุวิญฺญาณธาตุ จกฺขุวิญฺญาณนฺติ? อามนฺตาฯ

โสตวิญฺญาณํ…เป.… ฆานวิญฺญาณํ… ชิวฺหาวิญฺญาณํ… กายวิญฺญาณํ…ฯ

(ก) มโน มโนธาตูติ?

มโนธาตุํ ฐเปตฺวา อวเสโส มโน, น มโนธาตุฯ มโนธาตุ มโน เจว มโนธาตุ จฯ

(ข) มโนธาตุ มโนติ? อามนฺตาฯ

(ก) มโนวิญฺญาณํ มโนวิญฺญาณธาตูติ? อามนฺตาฯ

(ข) มโนวิญฺญาณธาตุ มโนวิญฺญาณนฺติ? อามนฺตาฯ

(ก) ธมฺโม ธมฺมธาตูติ?

ธมฺมธาตุํ ฐเปตฺวา อวเสโส ธมฺโม, น ธมฺมธาตุฯ ธมฺมธาตุ ธมฺโม เจว ธมฺมธาตุ จฯ

(ข) ธมฺมธาตุ ธมฺโมติ? อามนฺตาฯ

(ข) ปจฺจนีกํ

[11] (ก) น จกฺขุ น จกฺขุธาตูติ? อามนฺตาฯ

(ข) น จกฺขุธาตุ น จกฺขูติ?

ทิพฺพจกฺขุ ปญฺญาจกฺขุ น จกฺขุธาตุ, จกฺขุฯ จกฺขุญฺจ จกฺขุธาตุญฺจ ฐเปตฺวา อวเสสํ น เจว จกฺขุ น จ จกฺขุธาตุฯ

(ก) น โสตํ น โสตธาตูติ? อามนฺตาฯ

(ข) น โสตธาตุ น โสตนฺติ?

ทิพฺพโสตํ ตณฺหาโสตํ น โสตธาตุ, โสตํฯ โสตญฺจ โสตธาตุญฺจ ฐเปตฺวา อวเสสํ น เจว โสตํ น จ โสตธาตุฯ

(ก) น ฆานํ น ฆานธาตูติ? อามนฺตาฯ

(ข) น ฆานธาตุ น ฆานนฺติ? อามนฺตาฯ

น ชิวฺหา… (สํขิตฺตํ [ยํ สํขิตฺตํ (สฺยา.)], อุภโต อามนฺตา)ฯ

(ก) น กาโย น กายธาตูติ? อามนฺตาฯ

(ข) น กายธาตุ น กาโยติ?

กายธาตุํ ฐเปตฺวา อวเสโส น กายธาตุ, กาโยฯ กายญฺจ กายธาตุญฺจ ฐเปตฺวา อวเสโส [อวเสโส กาโย (สฺยา.)] น เจว กาโย น จ กายธาตุฯ

(ก) น รูปํ น รูปธาตูติ? อามนฺตาฯ

(ข) น รูปธาตุ น รูปนฺติ?

รูปธาตุํ ฐเปตฺวา อวเสสํ น รูปธาตุ, รูปํฯ รูปญฺจ รูปธาตุญฺจ ฐเปตฺวา อวเสสํ น เจว รูปํ น จ รูปธาตุฯ

น สทฺโท…เป.… น คนฺโธ น คนฺธธาตูติ? อามนฺตาฯ

น คนฺธธาตุ น คนฺโธติ?

สีลคนฺโธ สมาธิคนฺโธ ปญฺญาคนฺโธ น คนฺธธาตุ, คนฺโธฯ คนฺธญฺจ คนฺธธาตุญฺจ ฐเปตฺวา อวเสโส น เจว คนฺโธ น จ คนฺธธาตุฯ

(ก) น รโส น รสธาตูติ? อามนฺตาฯ

(ข) น รสธาตุ น รโสติ?

อตฺถรโส ธมฺมรโส วิมุตฺติรโส น รสธาตุ, รโสฯ รสญฺจ รสธาตุญฺจ ฐเปตฺวา อวเสโส น เจว รโส น จ รสธาตุฯ

น โผฏฺฐพฺโพ…เป.… น จกฺขุวิญฺญาณํ น จกฺขุวิญฺญาณธาตูติ? อามนฺตาฯ

น จกฺขุวิญฺญาณธาตุ น จกฺขุวิญฺญาณนฺติ? อามนฺตาฯ

น โสตวิญฺญาณํ…เป.… น ฆานวิญฺญาณํ… น ชิวฺหาวิญฺญาณํ… น กายวิญฺญาณํ…ฯ

(ก) น มโน น มโนธาตูติ? อามนฺตาฯ

(ข) น มโนธาตุ น มโนติ?

มโนธาตุํ ฐเปตฺวา อวเสโส น มโนธาตุ, มโนฯ มนญฺจ มโนธาตุญฺจ ฐเปตฺวา อวเสโส น เจว มโน น จ มโนธาตุฯ

(ก) น มโนวิญฺญาณํ น มโนวิญฺญาณธาตูติ? อามนฺตาฯ

(ข) น มโนวิญฺญาณธาตุ น มโนวิญฺญาณนฺติ? อามนฺตาฯ

(ก) น ธมฺโม น ธมฺมธาตูติ? อามนฺตาฯ

(ข) น ธมฺมธาตุ น ธมฺโมติ?

ธมฺมธาตุํ ฐเปตฺวา อวเสโส น ธมฺมธาตุ, ธมฺโมฯ ธมฺมญฺจ ธมฺมธาตุญฺจ ฐเปตฺวา อวเสโส น เจว ธมฺโม น จ ธมฺมธาตุฯ

2. ปทโสธนมูลจกฺกวาโร